درمون بو زر چل

سلام عزیزلم

داره هم گرما اومه و بو گند زر چل یه پاری ،باقیه خفه ایکنه، خمونیم تا چن سال پیش یکشم خم بیدم هر چی هم حموم ایرهتم چارش نیابید بقول قدیمی هر آدمی بو سنان بدنش یه جوری خارج یابو، مثلا یه پاری بو پاشون محلی گنده یا پاری بو میلشون یه پاری هم بو زر چلشون.

چاره چنه 

نه صابینه نه شمپو فقط و فقط باید زاگه (زاغ) آسیاب کنین روزی یه بار اول زر چلتونه بی او نم ایکنین بعد یه کمی پودر زاگ زر چلتون بمالین . دَ و شر بو گند زر چل ختون  راحت یابین. اه بخن بو خشهم بده یکمی محلب باش پودر کنین و قاطیش کنین،هم بو گند زر چلتون وه بین ایره هم بوتون خش ایبو.

یه گردی آسون تری هم یابو یه کم پودر زاگیه من شیشه مام بریزن بعد او ریش کنین و زرچلتون بسانین.

ده خدافظ بو گند زر چل.امتحان کنین حتمن راحت ایبین.هم خم تجربه کردم هم تعریفش و  باقی اشنفتمه

اما ایدونین علتش چنه ؟

وختی آدم عرق ایکنه جی مرطوب باعث تولید و رشد باکتری ایبو زر چله هوا نیزنه بعد باکتریل ایمیرن بو گندشون راس ایبو .

زاگ بخاطر اسیدی بیدن وه رشد باکتری جلوگیری ایکنه.هم یو باعث رفع بوی زر چل ایابو.

عطاریل دیلم هم مثله دکون کل حبیب پودر زاگه اماده دارن ایترین اونجو بسونین.

خدا بیامرزه اموات ونه که یو حالیش آبی و سی باقی گُ.